Wanderig Gurnigel-Hohmad-Stockhorn

Am e schöne Spätsummertag het dr Heinz "sy" Wanderig vom Gurnigu ufs Stockhorn - won-er scho lang mau het wöue unger d'Sohle näh - ändlech i Agriff gnoh. Mit em "Blausüüri-Express" isch er bis Thurnen u ab em Gürbetaler-Bahnhof mit em Poschi wo 08.38 Uhr abfahrt bis uf d'Wasserscheidi (Akunft ca. 09.14Uhr) gfahre. Vo dert us isch de dr Tippu i Richtig Länggrätli-Skilift, Chuebärg u Oberwirtnere losgange.  D'Wanderig uf SchweizMobil

Dr Wäg über Oberwirtnere - Salzmatte - Hohmad - Walalpgrat - Stockhorn

D'Übersichtscharte mit güetiger Hiuf vo Google Earth
D'Übersichtscharte mit güetiger Hiuf vo Google Earth

Die erschte 3 km bis zur Oberwirtnere-Hütte sy mehrheitlech flach u nume es liechts ufe u abe. So richtig gäbig zum Yloufe u zügig vorwärts cho. Es paar schöni Fotosujets ungerbräche aber mängisch dr rhythmisch Schritt. Byr Hütte höcklet dr Senn verusse u es git e churze Schwatz über Gott u d'Wäut. Sicher e chlyni Abwächslig i einsam Tag, de geits ume wyter i Grabe hingere...

Uf de erschte guet 4 km hei sech d'Bei gäbig yglüffe, ca. 1 h inkl. Bisli-, Foto- u Prichti-Haut. Hie ir Blatteheid isch dr töifscht Punkt vo dere Wanderig u Quellwasserfassig für d'Wasserversorgig Thuner-Westamt. Vo da a geits itze meh oder weniger steil dr Bärg düruf. E erschti ruppegi Schtigig isch bis i d'Salzmatte. Für d'Sennerei ufem Hohmad geit vo dert us es Seilbähnli i luftiger Höchi obsi für Material- u mängisch o Personetransporte. A das Bähnli het dr Heinz o e bsungregi Erinnerig... - da göh mir aber itze nid druf y.

By dr Lägerli Hütte acho, chunnt dr Senn zum Stall use u faht sofort mit em Heinz afa dorfe u so gits ume e wiukommeni Pouse. Gly druf geits de ume wyter: "Nimmsch mir da no die Heu-Plache u dä Räche mit zum Hüttli ueche" fragt dr Senn, er müssi no ga Heu ache hole. Heinz nimmt ihm das Gfergg gärn mit, dr Senn het ja sicher scho mängisch müesse... Für die nächschte 150 Höhemeter biete d'Wanderstöck e gueti Ungerstützig: Es isch hie fasch überhängend! Bym Langenggspitz-Hüttli begrüesse d'Guschti dä Fröndling u d'Heu-Utensilie chöj deponiert wärde. Es erschts wunderbars Panorama ufs Gürbetau zeigt sech eime hie.

Nacheme churze Düreschufe u digitalisiere vo dr umligende Gägend, wird dr Wäg ume früsch unger d'Schueh gnoh: Es geit itze ganz gäbig u fasch äbe em Hang entlang bis zur Hohmad Hütte, es sy ja nume no ca. 200 Höhemeter.

Nach mängem Jahr ume mau ufem Hohmad. Jugenderinnerige wärde wach. Aus Ching isch Heinz öppe zwöi Mau da obe gsy, e Bekannte ga bsueche, wo d'Guschti ufem Hohmad gsümmeret het. U de äbe mau mit Hanspeter, eme ehemalige CB-Funkerkolleg, zäme mit dr Sandra u Rahel hei sy es speziells Funker-Erläbnis gha i dere Hütte. Aues wär sicher nümm so presänt, we damals d'Lötschteu vom Kabuschueh zur Antenne nid broche wär u me nid mit de füürheisse 100-er Nägu usem Holzherd hätt müesse probiere die Lötschteu ume z'flicke, für das me nid vergäbe uf dä Hoger ueche gchräsmet wär...!

 

Itäm, zrügg zur Gägewart: Byr Hütte isch d'Sennerin am Hantiere u Putze vom Milch-Gschirr beschäftiget gsy. Nach dr Begrüessig het si mit em Wandersmaa no es paar Wort gwächslet u über es paar gmeinsami Bekanni dorfet u wie schträng öppe dr Summer isch gsy. Doch churzum geit d'Wanderig ume wyter u ufwärts em Hohmad Spitz entgage, es sy nume no guet 100m bis ufe Gipfu.

 

Zäme mit hunderte vo läschtige Flöige "gniesst" Heinz die verdienti Mittags-Pouse uf däm geniale Ussichtspunkt u vorauem ds 360°-Panorama. Da dr Gnuss i däm Flöigeschwarm aber nume beschränkt isch gits e churzi Rascht. Im Gipfubuech wird de no e Notiz hingerlah u de geit d'Wanderig i die flöigefreji Zone ume wyter. Dr Wäg geit zersch oschtwärts über e Grat u vor dr Möntschele rächts ab u dr steile Südflanke entlang. Zum Glück isch ds Gras troche, so dass me sichere Tritt fingt. By füechtem Gras wär dä Abschnitt nid empfählenswärt.

Unger am Möntschelespitz acho, geits de ume ganz gäbig dürs Widderfäud u a Chatz u Muus verby. Hie mues me grad ume chly luege wo me abschteit, es liege gar viu Steine im Wäg. Zügig geits de gägem Walalpgrat zue u uf die oberi Walalp ache uf 1720m. Vo hie us geits nume no düruf bis ufs Stockhorn uf 2180m (rechne selber...). Uf dr Nordsyte vom Stockhorn isch de e zimmli längi u steili "Schtäge" wo eime de no aues abverlangt. Die gwanete Normmass sy hie säute yghaute worde, drum isch es regumässigs ufeschtige gar nie müglech. Obe uf dr Schultere uf dr Weschtsyte vom Stockhorn acho, wird me de aber erneut mit eme herrliche Panorama belohnt u de spätischtens sicher obe bym Resto uf dr Terrasse u nid z'letscht ufem Gipfu.

Zyträchnig u Höheprofil vo dr zrüggleite Strecki

Die Grafik chunnt bewusst am Schluss, süsch wär d'Läserin oder dr Läser vo däm Bricht scho zum Vorus is Schwitze cho in Anbetracht vo dene Schtigige!

Zytbedarf für die entsprächende Etappe:

- Wasserscheidi - Blattenheid:  ca. 1 h

- Blatteheid - Hohmad Spitz:     ca. 2 h (inkl. 2x churz dorfe, 1x fötele)

- Hohmad Spitz - oberi Walalp  ca. 2 h 10'

- oberi Walalp - Stockhorn        ca. 1 h 10' (bis ufe Gipfu)


Wetteraussichten in der Region


Weitere interessante Links:



©

Alle Rechte vorbehalten:

Heinz und Barbara