Dampfbahnfahrt mit dr DFB

Us Alass vo Barbara's Geburi, hei "mir üs", das heisst dr Heinz zäme mit de Bekannte Marianne u Hans usem Nachbardorf, es bsungerigs Gschänk usdänkt: E Dampfbahnfahrt mit der DFB, dr "Dampfbahn Furka Bergstrecke". Da dr Hans scho sit eme Cheer by dene Ysebahner-Idealischte mit hiuft, het er üs das Projekt scho einegi Mal schmackhaft gmacht. So isch dä Alass grad wichtig gnue gsy, zum das Vorhabe i d'Tat um z'setze u Hans het sech de o grad aus Reiseleiter mit intressante Insider-Informatione abote. E wunderschöne Tag hei mir de grad verwütscht u so sy mir gmeinsam uf dere Bahnreis düre Lötschberg Basistunnu Richtig Wallis u mit dr MGB dürs Goms düruf gfahre bis nach Realp.

Bevor das mir "üse" Zug hei beschtige, het is Hans ufem churze Rundgang dür d'Wärchstatt e Yblick chönne vermittle, was näbscht dr Bahnfahrt süsch no für Revisions- u Ungerhauts-Arbeite usgfüehrt wärde. Nachdäm Hans de syner vile Bekannte Lütt begrüesst het im u rund ums Dienschtgebäude, hei mir de nachhär o mau chönne losdampfe...(mit Ton...).

Ds Geburi-Ching mit em "Gschänk"
Ds Geburi-Ching mit em "Gschänk"

 

Nach dere intressante, abwächsligsryche Schüttufahrt über die nostalgeschi Bärgstrecki u düre Furka-Scheitu-Tunnu, hei mir dä Ehreamts-Häufer vor DFB no churz zuegluegt, wie sy d'Dampflocki mit Mannes-Chraft um 180° g'cheert hei, damit die Maschine ume vorwärts het chönne vor e Zug ghänkt wärde für d'Rückfahrt.

 

Es bsungers Detail het is Hans de nid vorenthaute: Dr Bahnübergang über d'Houptschtrass mit dr absänkbare Zahnschtange, wo sech de äbe mängisch glych nid absänkt, we d'Barriere ume ufgeit. De gits äbe de öppe e Herusforderig für d'Zwöiradfahrer...!

Nachem usgedehnte Apéro im Gepäckwage vor DFB hei mir is de no Zyt gnoh, im Dorf öppis Feins ga z'gäbele i me agschribne Huus. Nach dere Schterchig hei mir de üsi Heireis aträte: Mit em Poschi sy mir über Ulriche u em Nufenepass dürs Bedretto-Tal uf Airolo gfahre. Dert hei mir ds Vercheersmittu gwächslet u sy mit dr SBB düre Gotthard-Tunnu i Richtig Luzärn ume zrügg is Bärnbiet cho.

Mir danke dr Marianne u em Hans ganz härzlech für dä wunderschön, gmeinsam Geburtstags-Usflug u vorauem für die intressante Informatione u Yblicke rund ume Betrieb u ds Funktioniere vo dr nostalgische Dampfbahn.

Wyteri Videos auf YouTube


zurück                        nach oben            

Wetteraussichten in der Region


Weitere interessante Links:



©

Alle Rechte vorbehalten:

Heinz und Barbara