Wanderig Kaufdorf - Gerzensee - Seftigen


Am Sunntig, 28. Ougschte 2011, het nach langer Zyt ume mau e praktisch nahtlosi "blaui Schtörig" gherrscht über dr Schwyz. E wunderbari Fernsicht mit agnähme Tämperature. Wär dä wundrschön Tag nid het chönne gniesse verusse, isch scho fasch z'beduure gsy.

Üse Usgangsort vo dr Wanderig isch bym Bahnhof z' Kaufdorf gsy. Dr Teerstrass nah, sy mir oschtwärts über d'Chabisäbeni uf Gälterfinge übere. Ds Wanderwägli geit dert lings vom Bächli nah gredi düre Hoger ueche, bis zu de oberschte Hüser unger dr Chramburg. Haub am Waudrand u im Waud sy mir ume Südfuess vom Bäup-Bärg a nid de biuigschte Villene verby uf Gerzesee cho. Wär ds nötige "Chlygäud" bynang het, cha sech dert e wunderschöni Wohnlag leischte.

Gerzensee Panorama

Panorama Gerzensee - Mühledorf - Kirchdorf

Vo Gerzesee i Richtig Kirchdorf geit dr Wanderwäg linggs vo dr Strass wäg über ne Fäudwäg. Me louft eso geng mit Sicht ufs Bärgpanorama, wo a däm wunderbare Sunnetag e bsungere Gnuss isch gsy.

Panorama ufem Wäg vo Gerzensee Richtig Kirchdorf:

Nach ca. 2h Wanderzyt sy mir z'Kirchdorf ids Dorf cho, rächts by dr Chiuche verby, gredi über ds Schtrassechrützigswirrwar übere, ar Beiz verby (bsungers hert für ne Musikant...!) u uf dr Südsyte vom Dorf ids Limpachmoos ache über e nöj agleit Wanderwäg em Bächli entlang. E schöne Wanderwäg, fernab vo auem Vercheer u Lärme: Eifach nume zum Gniesse!

Panorama gäge Kienersrüti, Falkeflueh, Hohgant, Sigriswylergrat

Panorama Kienersrüti - Falkenfluh

Nach ca. 13 km u knapp 4 h Wandere, Pöisele u Fotografiere, sy mir z'Seftige acho u hei dert dr "Chabis-Express" beschtige, won-is de i churzer Fahrt ume uf Kaufdorf a üse Usgangsort zrügg g'fahre het. E wunderschöni, gäbegi u sehr empfählenswärti Wanderig hei mir chönne gniesse.


Panorama oberhalb Seftigen:

Sigriswiler-Grat - Thun - Eiger-Mönch-Jungfrau - Niesen


zurück    nach oben            

Wetteraussichten in der Region


Weitere interessante Links:



©

Alle Rechte vorbehalten:

Heinz und Barbara