Rund ume Bantiger
E Spaziergang ufe Bantiger isch immer ume schön u jedesmau bietet d'Natur em ufmerksame Oug nöji Asichte u Perspektive.
E wyssi Version het sy de i der Altjahreswuche 2013 kreiert, nachdäm's i der Nacht ume mau so richtig g'schneit u g'huddlet het zäme mit ere zügige Byse.
Ufem Wäg vo dr Cholgruebe ufe Bantiger biete sech überau schöni Blicke uf ds Aare- u Ämmitau, d'Bärner Voraupe-Höger u ds berühmt-bekannte Panorama vor Schratteflueh über Eiger-Mönch-Jungfrau bis wyt i d'Friburger Bärge.
Bizzari Kreatione vo Schnee u Wind hei sech a de Sicherheitsgitter vo dr Schtäge uf d'Ussichtsplattform vom Turm bildet.
Ds Fitness-Programm uf d'Ussichtsplattform het sech auf jede Fall g'lohnt. Unger am Turm i de windschützende Tanne isch e agnähmi Temperatur gsy, aber obe uf dr Plattform het es byssig chüels Lüftli blase u um ne Chappe isch me de schono froh gsy u d'Finger am Uslöser o, wo sy ume mau i warm Sack hei dörfe!
Bantiger im Frühling - Sommer
... im Spätsommer - Herbst
Link zur Bantiger 360° Roundshot-Webcam
