Üsi musikaleschi Syte

Wi uf dr Startsyte bereits erwähnt, musige mir beidi aus Usglych zur Arbeit sehr gärn. Agfange het d'Barbara ihri musikaleschi Loufbahn mit em Akkordeon i dr Schuelzyt u het de o e Cheer i me Orcheschter mitgschpiut. Während es paar Jahr isch de aber das Inschtrumänt - dank dr Ggofere - nid ganz verschtoubet...(we de weisch was gmeint isch...!). Dr Heinz het i de Jugendjahr einigermasse (nid superguet, aber immerhin) glehrt Trumpete schpile. Wiu er i me Musigverein mitgmacht het, isch das Inschtrumänt nie zur Rueh cho. Wo mir üs de hei glehrt kenne, hei mer de zäme afa Musige u er Barbara ihres Akkordeon isch o ume meh us dr Ggofere usecho.

 

I üsere Familie isch d'Musig geng im Zäntrum gschtange u de hei o d'Ching das mit ufe Wäg becho. D'Rahel mit em Schwyzerörgeli vom Grossvättu chly weniger, d'Sandra de mit em Akkordeon chly meh. Am wytischte hets dr Stefan mit em Schlagzüüg (Drumset) u vorauem uf em Steel-Pan mit de Jazz-Improvisatione brunge.

 

Schlussändlech hei mir es paar Jahr es chlyns Familieorcheschter betribe, zäme mit zwee Kollege u Barbaras Schweschter, u es paar schöni gmeinsami Uftritte dörfe erläbe. Für di schpezielli Bsetzig, 4 Akkordeon, 1 Cornet u 1 Drumset, het d'Barbara für aui Musigschtück, vo Volkstümlech über Schlager / moderni Ungerhautig bis häre zu konzertanter Musig aui Note säuber arrangiert u gschribe. E riise Püetz, o trotz Kompi u Noteschrybprogramm.

Leider sy d'Inträsse i däm Ensemble nach es paar Jahr nümm für aui glych gross gsy u de het sech die Formation ufglöst. Sehr zum Leid vor Barbara wo so viu Härzbluet i das Projekt inveschtiert het.

 

Dr Heinz het de irgendeinisch vom "chlyne Bläch" ufs Es-Horn gwächslet, wiu's uf dr Alt-Schtimm eine brucht het. Mit em Es-Horn het er de o i diverse Brass-Chylformatione gmusiget. Mit der Zyt het sech's de ergäh, dass dr Heinz isch agfragt worde für i re Brassband mit z'schpile. U so het's em de dr Ermu ändgüutig ychegnoh, i re "reine" Blächformation mit z'mache. U wiu's i dere Band geng zweni Lüt uf dr Perkussion het gha, isch de zersch dr Stefan, üse Sohn, agfragt worde, ob er würd mithäufe. Das het er de o gmacht u i däm Sog inne, het "me" dr Barbara gseit, sy chönni doch mit de Platteinschtrumänt (Gloggeschpiu u Xylophon) probiere mit z'musige. Note kenn si ja u grad ganz taktlos syg si o nid. Nach öppe drei Monet intensivem Probe u Üebe u mit schlagchräftiger Ungerschtützig vom Stefan, het die ehemalegi Akkordeonischtin ihres erschte Chiuchekonzärt zäme mit ere Brassband beschtritte u het die Füürtoufi prompt u bravurös gmeischteret. Sider denn schlaht sech d'Barbara mit de Perkussions-Inschtrumänt umenang u dr Heinz versuecht sit churzem ume em Cornet müglechscht schöni Melodie z'entlocke. 

 

Zäme hei mir mit ufgschteute Lütt ir Brassband Musig Frohsinn z'Oberburg dörfe musige.

Leider isch es em Heinz us bruefleche / zytliche Gründ afangs 2016 nümm ganz müglech gsy, aues unger ei Huet z'bringe. U so hei beidi schwären Härzens ihres lieb g'wordene Hobby (momentan) müesse ungerbräche.

 

2011 - Mit der MFO am eidg. Musigfescht z'St. Gallen
2011 - Mit der MFO am eidg. Musigfescht z'St. Gallen
2012 - Am Whit Friday Brassband-Contest in Saddelworth - England
2012 - Am Whit Friday Brassband-Contest in Saddelworth - England

2014 - Am Bernisch kantonalen Musikfest in Aarwangen



 

 

 

Wetteraussichten in der Region


Weitere interessante Links:



©

Alle Rechte vorbehalten:

Heinz und Barbara